Sunday, October 2, 2011

തൊണ്ടി മുതൽ ലേലം വിളിച്ച് വിൽക്കാമോ??

ഇത് അല്പം ഗൌരവമുള്ള കാര്യം ആണ്. എന്നാൽ ആരേം ബാധിക്കാത്ത കാര്യവും! അല്ലെങ്കിലും നമ്മൾ മലയാളികൾക്ക് ഒരുപാട് കാര്യങ്ങൾ ബാധിക്കാറില്ല. നമുക്ക് നമ്മ തന്നെ ബാധ!


എന്നാലും ഒരു ചോദ്യം... ഇത് അനീതിയോ നീതിയോ..


ഭാര്യയുടെ പത്ത് പവൻ വരുന്ന മാല ആരോ മോട്ടിച്ചു! കേരളാ പോലീസിനൊരു വെല്ലുവിളിയായ് പെറ്റീഷനും കൊടുത്തു. അത്മാർത്ഥതയുടെ കാര്യത്തിൽ രാജ്യാന്തര മാതൃക ആയ കേരള പോലീസ് കേസ് പടപടാന്ന് കൈകാര്യം ചെയ്തു. സമയം ഒട്ടും പാഴാക്കാതെ കള്ളനെ പിടിച്ചു. അവന് കോടതി ശിക്ഷയും വിധിച്ചു. പിഴയും ജെയിലും എല്ലാം. സന്തോഷാ‍യി!


മോഷ്ടിക്കപെട്ട മുതൽ അതിന്റെ ഉടമയ്ക്ക് തിരിച്ച് നൽകണം. അതാണ് നീതി. പക്ഷേ നടന്നത് വേറൊന്ന്. പത്ത് പവന്റെ മാല സർക്കാർ വക ലേലത്തിൽ വച്ചു. എന്നിട്ട് കിട്ടിയ തുക ഖജനാവിലേക്കടച്ചു!












കേരളത്തിൽ ഇന്ന് നിലവിലുള്ള മാഫിയകളിൽ പാർട്ടീ കണ്ടുപിടിത്തം ആയ മാധ്യമ മാഫിയ കഴിഞ്ഞാൽ ഏറ്റവും വലിയ മാഫിയ മണൽ മാഫിയ ആണ്! കാ‍ര്യം അവർക്ക് യൂണിയനൊന്നൂല്ലെങ്കിലും പുഴ ഉള്ളിടത്തെല്ലാം അവർ ഉണ്ട്. പക്ഷേ കേരളാ പോലീസ് അത്ര മോശക്കാരല്ല... മറ്റെന്ത് കള്ള കടത്തും നടക്കും. മണൽ കടത്ത് നടക്കില്ല. കൺ വെട്ടത്ത് കണ്ടാൽ (കണ്ടാൽ മാത്രം) അപ്പൊ പിടിക്കും. കയ്യോടെ പിഴ അടപ്പിക്കും ബാക്കി ശിക്ഷകളും കൊടുക്കും. കർമ്മോത്സുകരായ ഒരു ഡിപ്പാർട്ട്മെന്റും പോലീസും ഉണ്ട് നമുക്ക്.


പക്ഷേ എല്ലാം കഴിഞ്ഞ് ഈ തൊണ്ടി മുതൽ എന്ത് ചെയ്യും? അവകാശിക്ക് തിരികെ കൊടുക്കുവോ? അതോ സർക്കാർ വക ലേലം വിളിച്ചും (വിളിക്കാതെയും) വിൽക്കുവോ? എങ്കിൽ അതിലെന്ത് നീതി! എന്റെ മുതൽ കളവ് പോയി അത് പോലീസ് കണ്ടെടുത്താൽ അത് എനിക്ക് തിരികെ തരേണ്ടതല്ലേ? അല്ലെങ്കിൽ മോട്ടിച്ചവന്റേന്ന് മോട്ടിക്കുന്ന പോലാവുല്ലെ..!


മണൽ കടത്ത് പിടിക്കുന്നതെന്തിനാ.. പുഴകളിൽ അല്പം മണൽ ബാക്കി ഉണ്ടാവാൻ! പുഴ തന്നെ ഉണ്ടാവാൻ! അപ്പൊ പിടിച്ച മണൽ പുഴയിൽ തിരികെ നിക്ഷേപിക്കണം! ഇനി അത് സർക്കാർ ചെലവിൽ ബുദ്ധിമുട്ടാണെന്നാണേൽ കട്ടവനെ കൊണ്ട് തന്നെ മണൽ ഇറപ്പിക്കണം!


പുഴകൾ കോടതി കയറാത്തതു കൊണ്ടും പുഴകൾക്ക് വോട്ടില്ലാത്തത് കൊണ്ടും കുഴപ്പോല്യ!

1 comments:

ഉം, ഇതൊക്കെ പറയാം. കൊല്ലത്ത് ഒരു പുഴ മണലടിഞ്ഞു നികന്നു കൊണ്ടിരിക്കുന്ന വാര്‍ത്തയും ചിത്രവും പത്രത്തില്‍ കണ്ടു. മണല്‍വാരല്‍ ചില പുഴകളെ രക്ഷിക്കും, മറ്റുചിലതിനെ നശിപ്പിക്കും.

Post a Comment